Яңа ел белән!

Яшь чыршылар киң итәкле
Күлмәкләрен кигәннәр,
Җитәкләшеп, бергәләшеп
Юл буена килгәннәр.

Энәле күлмәкләренә
Карап тордык сокланып.
Тик Равил берничә энә
Өзеп алды шукланып.

Апа әйтте: «Болай эшләү –
Начар гадәт, бел менә:
Һәр чыршы күлмәк алыша
Җиде елга бер генә».

Бу энәләрен йолыксак,
Чыршы күлмәксез калыр.
Җиде ел буена ничек
Күлмәксез яши алыр?

Бәйрәм җиткәнен чыршы
Кайлардан гына белгән.
Энәле күлмәген кигән дә
Безгә кунакка килгән.

Тагы да купшыланды
Ул безгә килгәчтен дә.
Урын бирдек аңарга
Өебезнең нәкъ түрендә.

Тәмле ылыс исләре
Бүлмәләргә таралган.
Күз яуларын алырлык
Булып ул хозурланган.

Дуслар белән бергәләп
Бәйрәмне каршыларбыз.
Чыршы тирәли уйнап,
Җырлап күңел ачарбыз.

Кыш бабабыз да соңламас
Тиздән ул килеп җитер.
Тылсымга, могҗизага бай
Яңа ел бүләк итер.