Агитбригада

Игенче хезмәте — иң мактаулы, шул ук вакытта иң авыр һөнәрләрнең берсе. Кечкенәдән авыл кешесе- нең тормышы җир, басу, иген кырлары белән бәйләнгәнен, игенчеләрнең көнне төнгә ялгап басу-кырларда тир түккәнен күреп үскәнгәдер, авылдашларыма, игенчеләргә карата ихтирамым зур минем. Авылның язмышы, киләчәге, яшәеше уңган кешеләренә бәйләнгән икәнен барыбыз да беләбез. Уйлый калсаң, бу, чыннан да, шулай. Авыл җирендә гомер итүче кешедә уңганлык сыйфаты булу — иң мөһим таләпләрнең берсе. Авыл хуҗалыгында эшләүчеләргә сокланмый мөм- кин түгел. Көне-төне диярлек, яңгырда да, кышкы бураннарда да алар үз хезмәтләрен намуслы башкаручы һөнәр ияләре. Аларның эше бер көнгә дә тукталмый, диярлек. Авыл хуҗалыгы тармагында хезмәт салучы кеше уңга-сулга карарга да өлгерми, эшнең башкасы җиңнән тарта.  Эх, икмәк булса, җыр да була бит! Быелыгысы, корылык елда, бигрәк тә. Һәр бөртекнең кадере зур! Көн буе эсседә уракта урган комбайнчылар хезмәте җиңелләрдән түгел. Аларның эш кәефләрен тагын да арттыру өчен кырга агитбригада белән чыктык. Матур җырларыбызны, шигырьләребезне бүләк иттек.