«Үзеңне наркотикларга бәйләмә»

Наркомания бүгенге көндә чын-чынлап бәлага әйләнде. Наркомания колы булучыларның күпчелеге бу ялгыш юлга, “берни дә белмәгәнлектән” кереп китә. Соңгы вакытта мәктәп яшендәге балалар арасында наркотик матдәләр кулланучылар, “яфрак көйрәтү” белән мавыгучыларның артып китүе, врачларны гына түгел, ата-аналарны hәм укытучыларны да хафага сала.  Наркотиклар борынгы заманнардан ук билгеле. Аларны куллану борынгы кешелек тормышы барлыкка килгәч үк барлыкка килгәндер, мөгаен. Бик борынгы заманнардан ук  йотканнар, чәйнәгәннәр, сулаганнар, ә соңгы араларда шприц ярдәмендә кертәләр. Наркотик матдәләр кешенең үз-үзен һәм  тирә-юньне аңлау сәләтенә йогынты ясый, алар “наркомания” дигән психик авыру китереп чыгара. Наркоманнар наркотикларсыз яши алмый башлый, бу матдәләр организм өчен даими ихтыяҗга әверелә.

     Укучыларны кешелек дөньясының наркотик матдәләрне куллану тарихы белән таныштыру, наркоманиянең килеп чыгу hәм таралу сәбәпләрен аңлату, яшьләрне тормышта дөрес яшәү рәвешләрен сайлап алу мөмкинлеге үзләреннән генә торганына инандыру, наркотикларга бәйлелек сәбәпләрен аңлату максатыннан  27 июнь көнне Олы Мәтәскә авылы китапханәсендә “Үзеңне наркотикларга бәйләмә” дип исемләнгән  түгәрәк өстәл үткәреләчәк.