Праздничный концерт « Җырларыбыз бары Сезгә»

23 февраль — Ватанны саклаучылар көне. Бу бәйрәм 1918 елныӊ 23 февраленнән бирле Кызыл Армиянеӊ туган көненә туры китереп билгеләп үтелә.  Ә1943 елдан Совет Армиясе көне дип йөртелә башлады. Ә 1993 елдан Ватанны саклаучылар көне дип үзгәртелде. 2001 ел ахырында Ватанны саклаучылар көнен бәйрәм көне итү хакында хөкүмәт карары чыкты. Быел  20 нче тапкыр эшкә бармыйча бәйрәм итәбез бу көнне. Димәк, үзенә күрә кечкенә генә юбилей да икән әле. Ватанны саклаучылар дибез. Кемнәр соӊ алар?  Алар иӊ элек өлкән буын вәкилләре — сугыш кырында үзләрен аямыйча дошманга каршы сугышкан кешеләр ,  тылда илебез иминлеге өчен алны-ялны белми эшләгән хатын-кызлар, әтиләре сугышка киткәндә нәни генә булып калган балалар — бүген инде үзләре  70 тән узган апалар, абыйлар, төрле елларда Совет Армиясе сафларында хезмәт иткән ир-егетләр, бүгенге көндә Армиядә хезмәт итүче лачын кебек егетләр, бүген-иртәгә Армия сафларына китәсе егетләр, хәзер әле мәктәптә укучы, киләчәктә илебез иминлеген саклаячак егет-малайлар, әле бу дөньяга килеп, телләре дә ачылыр ачылмас «солдат булам» дип йөрүче нәни малайлар! Бу көн — сезнеӊ бәйрәм!