«Коррупция юк»

Коррупция-ришвәт алу яки бирү юлы белән теләгеңә ирешү. Дәүләтчелек булган җирдә коррупция булмый кала алмый. Чөнки һәр дәүләттә чиновниклар бар. Ә коррупция — ул чиновниклар чире. Аны дәвалау бик авырдыр, күрәсең. Дәүләтләр бу чир белән күп гасырлар буе көрәшкән. Ләкин нәтиҗәсе генә бик күренми. Шулай да кайбер дәүләтләр уңышка ирешкән дияргә мөмкин. Тик безнең дәүләт түгел. Киресенчә, ришвәтчелек (коррупция) бездә киңрәк колач ала бара.

        Узган гасырның 90 нчы елларыннан соң социализм таркала. Шуннан соң канун бозу очраклары ешрак күренә башлый. Бәлки, бу турыда ачыктан –ачык яза башлыйлардыр. Ришвәтчелекнең бигрәк тә хастаханәләрдә, табиблар арасында көчәюе аяныч. Ришвәт алучы табиб үзенең авыруын яхшырак карый, яхшырак дәвалый. Ә башка авыруларына ул тиешле дәрәҗәдә игътибар итми, үз вазыйфасына салкын карый. Табиб, ришвәт алып, үз мәнфәгатьләрен кайгырта, ә ришвәт бирүче авыру үзенең теләгенә ирешә, савыга. Шул хәлләрне күреп торучы моңа каршы көрәшми, ә үзе дә ришвәт бирә. “Төртерлек” акчасы булмаганнарның күпчелек булуы  — фаҗиганы тагы да тирәнәйтә.