Җәйге хатирәләр

«Кама таңнары» әдәби берләшмә язучылары белән оештырылачак «Җәйге хатирәләр» түгәрәк өстәленә шәһәребезнең барлык иҗат әһелләре көтелә. Каникуллардан соң очрашу сәгатендә һәр каләм тибрәтүче, яңалыклар белән уртаклашачак. Җәйге матур көннәр кочагында алган тәэсирләре белән уртаклашуны тагын да баету максатыннан фотосүрәтләрне алып килү сорала. Яңа язган әсәрләрен тикшереп, шигырьләрен укып, төзәтеп, фикер алышу булачак. Һәр яңалыкны яңадан яңартып, уртаклашып алачакбыз. Оешма җитәкчесе Рәсимә Харис кызы Нәбиуллина алдагы эш планнарын тәгъдим итәчәк. Үзгәртүләр, башка юнәлештәге проектларны карап, алдагы елга программа кабул итү каралачак.

  Әйе, быел язучыларыбыз зур югалтулар кичерде. Араларыннан өч Татарстан Язучылар берлеге әгъзалары — Хөсәен Җәгъфәр, Рифкат Имаев, Илдар Хәйруллин бакыйлыкка күчте. Әлеге күренекле язучыларны искә алып, әсәрләрен укып узачакбыз. Алар хакында  газетага мәкалә язу өчен җаваплы кешеләр билгеләнәчәк. «Әдәбият корабы», «Әдәби тукталыш» проектлары дәвам ителеп, анда чыгыш ясаячак язучылар билгеләнәчәк.

   Иҗат әһелләре бик сизгер һәм күзәтүүчән халык. Һәр яңа көн аларга язар өчен җирлек тудыра. Аралашуны һәрчак булдырып тору, иҗатларын укучыга вакытында җиткерү  максатыннан узачак әлеге чара бик күңелле узар, дигән өметтә калабыз.