«Җиңү таңы»

Равил ФӘЙЗУЛЛИН

Хәтер

(Ветеран җыры)

Гомер узган саен тынмый күңел -

Үткәннәргә хәтер еш кайта;

Тыныч көндә авыр тойгы булып,

Сугыш яраларын кузгата.

Әй син, Хәтер, гомер язларыннан

Безнең яшьлекләрне чакырып ал!

Җырлыйк әле!

Безнең бу көйләрдә

Кайтмый калганнарның хакы бар!

Көрәшләргә чыктык ил чакыргач,

Газиз башлар ниләр күрмәде!

Нинди генә суны кичмәдек тә,

Нинди генә утка кермәдек!

Еллар арты еллар агалар…

Тормыш үзәгендә — яңалар.

Сорый Хәтер: безнең үткәннәргә

Тугрылыкны саклыймы алар?

Әй син, Хәтер, гомер язларыннан

Безнең яшьлекләрне чакырып ал!

Җырлыйк әле!

Безнең бу көйләрдә

Кайтмый калганнарның хакы бар!

Тулырак: http://madanizhomga.ru/news/kykregemde-shigyir-utyim-saumyi/i-kne-iel-birelmde

Фәрит СУФИЯРОВ

Планетада Җиңү бәйрәме

Кырык бердә

Җырлап ирләр китте…

Онталмыймын шушы иртәне.

Күңел кыры һаман бушап бара,

Хәтер саклый әле күпләрне.

Ул чагында

Дошман явы килде,

Сөремләнде офык читләре.

Канга сусап улап чыкты

Чик буеннан фашист этләре.

Ата-улын,

Ана кызын озата,

Мәхшәр көне мени шул чаклы.

Сафлар булып көрәш мәйданына

Күтәрелде бөтен ил халкы.

Ташкын төсле,

Ургып нәфрәт таша,

Йөрәк сызлый, күңел яралы.

Һәрбер кеше

Ил язмышын

Үз язмышы итеп карады!!!

Тез чүкмәдек

Дошман каршысында -

Ихтыяр да, көч тә җитәрлек.

Көрәш кырын узган

Ал байракны,

Рейхстаг өстенә үк күтәрдек.

Тарих белми

Мондый батырлыкны,

Һәйкәлләрдә чәчәк бәйләме.

Планетабыз буйлап аваз сала

Тантаналы Җиңү бәйрәме.

Тулырак: http://madanizhomga.ru/news/kykregemde-shigyir-utyim-saumyi/i-kne-iel-birelmde

Тулырак: http://madanizhomga.ru/news/kykregemde-shigyir-utyim-saumyi/i-kne-iel-birelmd